طبعا مش هاعتذر إني ماردتشي على التعليقات ..بس ماخبيش عليكم إني مرهق أوي..ومش قادر أرد
يوم الجمعة بيبقى شغل طحن .... لازم أدي تقرير عن كل إمام واللي اتنيل على عينه وقاله في خطبته
ولازم ألف عليهم كلهم أقولهم يتكلموا في ايه وآخر التعليمات ..بس الحق يتقال ..الشغل خف عن زمان
أصل أنا برضك نفضت المنطقة بتاعتي من الناس بتوع الإخوان وأي حد فاكر نفسه_بروح أهله_هو اللي هيصلح
البلد
آخرهم كان شارب جركن شجاعة ..وقال في خطبته ايه _الإمام البنا _..ماكدبشي عليكم ..أول ما قالها سخست على نفسي من الضحك
خليت كل اللي قاعدين يبصولي بإستغراب... لأ وبعد ما كلمته بعد ما خلص عاند معايا ..تاني يوم ..كان منقول ..عادي جدا
أنا بشتغل جدا بضمير ..ما عرفتش أنام مرة ..لما خطيب كان بيحكي عن سيدنا موسى وفرعون
قعدت في السرير ..أفكر ..يقصد يلمح ..ولا ما يقصدش
بس في الآخر ..قلت لنفسي..يا واد يا مخبر ..خد بالأحوط ..انقله هوا كمان
ولا اللي دعا لبتوع غزة..يا لهوي..دا قصة لوحده
اللي نفسه أفهمه ..الناس دي مال أهلها بالسياسة
مش الوضوء والطهارة دين برضك
بس زي ما المأمور دايما بيقوللي ..دول ناس بيستغلوا الدين في السياسة
أكمل مرة تانية بقى ..لسه هاقدم تقارير النهارده
الجمعة، 23 مايو 2008
الاشتراك في:
تعليقات الرسالة (Atom)
هناك 8 تعليقات:
شكلك مخبر شاطر ممكن يعينوك كبير مخبري الوطن
ويعملولك جايزة الازية الكبرة
والرئيس يامرلك بعيد المخبرين وندي كل مصر اجازة عشان خاطر كبير المخبرين
ادعوك لزيارة مدونتي واتمني التواصل الدائم بيننا
ماشاء الله عليك هوا ده الشغل ولا بلاش
بس انتا بتقبض كام يا معلم
بالعمله السهله ولا الصعبه
يااااااااااى شكلك مقرف قوى
روح استحما وتعالى علق عندى تانى
باى باى
يا حبى
ههههههههههه
مع تحيات ماتسميه انتا بالطفل الصغير
خلى بالك انا مش صغير
بس مش فاضيلك للاسف
ولو عندك حاجه تقدر تعملها اعملها بس امجز عشان طفلك (انا ) مخنوق
سلااااااااااام
100 100
بس دول مبقوش كتير برضه يا عم المخبر
احنا الخطيب حدانا يعجبك قوي ..
مرة يخطب عن الجمل ، والإعجاز العلمي في الجمل
ومرة يقولك "ورأى قبة بيضاء من الزبرجد الأخضر" !
حاجة 100 100 برضه
---
ربنا يعينك
شكلك بتتعب قوي
الله يكون في عونك
بانتظار بقية تقاريرك ...
أيها المخبر الهمام
انت بتتباهى بايه؟
أتقبل جادا كل ثناءا ..وأقول أن كل هذا التعب هو لكم وبكم ومنكم وفي الآخر والأول احنا بسترزق عليكم
ههههههههههههههههههههههه
حضرتك بتتكلم بجد
يعني مخبر مخبر ولا ايه
طيب انا كويسة والله وبامشي جنب الحيط اهو
هههههههههههههههههههههههههههههه
تحياتي
إرسال تعليق